Mamlakatimiz qishloq xo‘jaligida, xususan, paxta yetishtirish va uni qayta ishlashda izchil islohotlar amalga oshirilmoqda. Paxta yetishtirishda davlat buyurtmasi bekor qilinib, erkin bozor tamoyillariga o‘tildi. Klaster tizimi bosqichma-bosqich rivojlantirib borilmoqda.
30-sentyabrdan 3-oktyabrgacha davom etgan“Xalqaro paxta bo‘yicha Maslahat kengashining 82-yalpi majlisi” mana shu islohotlarning samarasi o'laroq tashkil etildi.
Tadbirda bir qator plenar sessiyalar tashkil etildi. Ularda global iqlim o‘zgarishi sharoitida paxtachilik sektoridagi mavjud hamda kutilayotgan muammolar yuzasidan qator takliflar berib o‘tildi.
Shuningdek, paxta yetishtiruvchi davlatlarda paxtachilik va to‘qimachilik sanoati sohasidagi tadqiqotlarda erishilayotgan so‘nggi yutuqlar, o‘zaro tajriba almashish va g‘o‘za yetishtirishda global iqlim o‘zgarishi hamda mintaqaviy muammolar muhokamasi hamda yechimlari bo‘yicha aniq takliflar ishlab chiqildi. Bundan tashqari, paxtachilik sohasida jahonda erishilgan so‘nggi yutuqlar, sohada joriy etilayotgan ilg‘or texnologiyalar olimlar tomonidan taqdimotlar orqali xalqaro paxtachilik hamjamiyatiga tanishtirildi.
Tadbirning yopilish marosimida qishloq xo‘jaligi vaziri Ibrohim Abdurahmonov hamda bir qator ishtirokchi davlat vakillari mazkur yalpi majlis davomida ko‘tarilgan masala va undan kutilayotgan natija, kelishuvlar, taklif va tashabbuslari bilan o‘rtoqlashdi.
Binobarin, vazir Ibrohim Abdurahmonov o‘z nutqi davomida ushbu tadbirni yurtimizda o‘tkazilayotgani biz uchun katta imkoniyatligini hamda so‘nggi yillarda paxtachilik sohasida amalga oshirilayotgan islohotlar samarasi ekanligini aytib o‘tdi.
Bundan tashqari, plenar sessiyalar davomida paxta sektoridagi muammolarga yechim topish borasida ishtirokchi davlatlarning takliflari juda ham muhim vosita bo‘lib xizmat qilishi ta’kidlandi.
O‘z navbatida, vazir paxtachilik sohasi O‘zbekiston uchun juda ham muhim ahamiyat kasb etishini, bugungi tadbir esa, yangicha davr boshlanayotganidan darak ekanligini ta’kidlab o‘tdi.
Vazir nutqi so‘ngida tadbirda qatnashgan barcha davlat vakillariga ishtiroki uchun o‘z minnatdorchiligini bildirib o‘tgan holda, tadbir davomida berilgan takliflarni yurtimizda qo‘llash borasida barcha imkoniyatlarni ishga solinishini ta’kidlab o‘tdi.
Aytish kerak, ushbu tadbir davomida iqlim o‘zgarishi, suvdan foydalanish va paxta yetishtirishda zararkunandalarga qarshi kurash kabi masalalar bo‘yicha umumiy munozaralar orqali ekspertlar bilan birgalikda mahalliy sharoitga moslashtirilgan yechimlar ishlab chiqildi. Bundan tashqari, paxta tozalash va to‘qimachilik mahsulotlarini qayta ishlash sohasidagi innovatsiyalar bilan tanishildi.
Shuningdek, paxtachilikda xalqaro standartlarni qabul qilish, paxta sektori haqida xabardorlikni oshirish va paxta xomashyosi va tayyor to‘qimachilik mahsulotlari uchun yangi bozorlarga yo‘l ochish masalalari borasida takliflar tinglandi.