QISHLOQ XO`JALIGIDA BILIM VA
INNOVATSIYALAR MILLIY MARKAZI
FUQAROLARNING  MUROJAATLARI

Fuqarolarning murojaati


Ўзбекистон шоличилигидаги тадқиқотлар Вьетнам экспертлари томонидан ўрганилди

  • 14.10.2019

Қишлоқ хўжалиги вазири ўринбосари, Қишлоқ ҳўжалиги ва озиқ-овқат таъминоти илмий ишлаб чиқариш маркази Бош директори Б.Халиков Хоразм вилоятида Вьетнам қишлоқ хўжалиги  ва қишлоқларни ривожлантириш вазирлиги катта эксперти Tran Quang Chieu билан учрашди.

Учрашувда Шоличилик илмий-тадқиқот институтининг Хоразм филиалидаги шоли экини ҳолати ва Жанубий Кореянинг KOPIA маркази билан ҳамкорликда бажарилаётган ишлар, жумладан, шоли кўчатини механизация ёрдамида экиш усули бўйича олиб борилган дала тажрибалари  ҳақида маълумот берилди.

Б.Халиков эксперт Tran Quang Chieuга ташриф учун миннатдорлик билдирар экан, Ўзбекистонда олиб борилаётган илмий-тадқиқот ишларига хориж тажрибаси кенг қўлланилаётганини билдирди. Бундан ташқари Ўзбекистонда Вьетнам шоличилик тажрибасини қўллаш, унинг шоли навлари, уруғчилиги ва етиштириш агротехнологиялари тўғрисида фикрлар алмашилди.

Шоличилик илмий-тадқиқот институтининг Хоразм филиали бугунги  кунда Жанубий Кореянинг “National institute of Crop science” илмий-тадқиқот институти, Қишлоқ хўжалигини ривожлантириш халқаро агентлигининг Ўзбекистондаги “KOPIA” маркази  ҳамда “TYM” (Tong Yang Moolsang) компанияси билан ҳамкорликда бир неча лойиҳаларни амалга оширмоқда.

Учрашув якунида келгусида Ўзбекистонда шўрланган ерларга мос бўлган шоли селекцияси, шу тупроқларда шолини етиштириш агротехникаси, бирламчи уруғчилик тизимини ривожлантиришга қаратилган Шоличилик илмий-тадқиқот институти ҳамда Вьетнамнинг “Меконг” шоличилик илмий-тадқиқот институти ўртасида ҳамкорликка оид шартнома имзоланишига келишиб олинди.

Қишлоқ хўжалиги ва озиқ-овқат таъминоти

илмий-ишлаб чиқариш маркази

Матбуот хизмати