Ўзбекистонга Япониянинг Токио Қишлоқ хўжалиги ва технологиялар университети профессор олимлари  томонидан шолининг шўрга чидамли IRRI 154, IRRI 147 ва IR29 навлари намуналари олиб келиниб, вегетация майдонида экилиб синалмоқда.

Мазкур лойиҳа жорий йилда Қишлоқ хўжалиги ва озиқ-овқат таъминоти илмий-ишлаб чиқариш маркази ҳамда Япониянинг Токио қишлоқ хўжалиги ва технологиялар университети ўртасида имзоланган келишув доирасида амалга оширилмоқда.

Шоличилик илмий-тадқиқот институтути берган маълумотга кўра, мазкур шўрга таъсирчан, қурғоқчилик, фосфор ва цинк етишмаслигига чидамли навлар синалгандан сўнг, тез орада мамлакатимизнинг шоличилик кўп етиштириладиган ҳудудларида экилади.

Бугунги кунда Ўзбекистонда “Искандар”,  “Лазурний”, “Мустақиллик”, “Тарона” каби шоли навлари етиштирилиб, шолининг янги навларини жорий этиш, уни янги технологиялар асосида етиштиришга алоҳида эътибор берилмоқда. Жумладан, Ўзбекистонда Жанубий Кореянинг Tong Yang Moolsang компаниясининг замонавий машиналари ёрдамида шолини кўчат усулида етиштириш ҳам йўлга қўйилиши кутилмоқда. Кореядан “TYM” (Tong Yang Moolsang) компаниясининг қўлда итариб, шунингдек, RF-48 ва устига миниб бошқариладиган РRO600V русумли кўчат экиш машиналари келтирилиб, шоли етиштириш технологиясини механизациялаш йўли билан такомиллаштириш ва юқори ҳосил олишга қаратилган эксперемент олиб борилмоқда.