QISHLOQ XO`JALIGIDA BILIM VA
INNOVATSIYALAR MILLIY MARKAZI
FUQAROLARNING  MUROJAATLARI

Fuqarolarning murojaati


Ташкил этилаётган агросаноат кластерига қандай имтиёзлар берилмоқда?

  • 11.12.2018

Ташкил этилаётган агросаноат кластерига қандай имтиёзлар берилмоқда?

 
Тошкент вилоятининг Қуйи Чирчиқ туманида замонавий агросаноат кластери ташкил этилмоқда.
 
Ушбу агросаноат кластерида тўғридан-тўғри хорижий инвестициялар, халқаро молия институтларининг маблағлари, хорижий банкларнинг кредит линиялари ва тижорат банкларининг кредитлари жалб этилади. Бунинг ҳисобига пахта хомашёси, бошоқли дон ва бошқа қишлоқ хўжалиги маҳсулотларини етиштириш, уларни чуқур қайта ишлаш бўйича ишлаб чиқаришлар, шунингдек, чорвачилик ҳамда балиқчилик комплекслари ташкил этилади.
 
Бу ҳақда Ўзбекистон Республикаси Вазирлар Маҳкамасининг 2018 йил 1 декабрда қабул қилинган “Тошкент вилоятининг Қуйи Чирчиқ туманида замонавий агросаноат кластерини ташкил этиш чора-тадбирлари тўғрисида”ги қарорида кўрсатиб ўтилди.
 
Мазкур ҳужжатга мувофиқ, хорижий инвестициялар иштирокида масъулияти чекланган жамият шаклидаги “Tashkent Cotton Textile cluster” korxonasi (“TST cluster” МЧЖ) ташкил этилади ва унинг дастлабки устав капитали Буюк Британия ва Россия Федерацияси компанияларининг бадаллари ҳисобига шакллантирилади.
 
“TST cluster” МЧЖ таркибига кирадиган агросаноат корхоналарига пахта хомашёси, бошоқли дон ва бошқа маҳсулотларни, шунингдек, чорвачилик ҳамда балиқчилик маҳсулотлари етиштиришни ташкил қилиш учун Қуйи Чирчиқ туманида доимий эгалик қилиш ҳамда фойдаланиш ҳуқуқи билан 35,4 минг гектар суғориладиган ер ва 3,1 минг гектар балиқчилик кўллари ажратилади.
 
Шу билан бирга, кенг турдаги балиқ маҳсулотларини етиштириш, қайта ишлаш ва сотиш, экспорт қилиш бўйича замонавий комплекс ташкил қилиш учун собиқ “Балиқчи” АЖ мулкий комплекси янги иш ўринлари ташкил этиш ва 8,2 миллион доллар миқдорида инвестиция киритиш шарти билан “TST cluster” МЧЖга “ноль” харид қийматида сотилади.
 
Ҳужжатда “TST cluster” МЧЖнинг агро-корхоналардан олинган ҳамда ушбу корхоналар ўртасида бериладиган, ўзлари ишлаб чиқарган маҳсулотни сотиш бўйича айланмалар билан боғлиқ бўлмаган пул маблағлари ва мол-мулк, шунингдек, соф фойдани тақсимлаш солиқ солиш объекти ҳисобланмаслиги белгилаб қўйилган.
 
“TST cluster” МЧЖ ва агро-корхоналар томонидан ўз ишлаб чиқариш эҳтиёжлари учун белгиланган тартибда шакллантириладиган рўйхатлар бўйича олиб келинадиган ускуналар, махсус транспорт воситалари, қишлоқ хўжалиги техникаси, эҳтиёт қисмлар ва бутловчи буюмлар, моддий-техника ресурслари, хомашё, материаллар ҳамда ўсимликлар 2022 йил 1 январгача божхона тўловларидан (божхона йиғимларидан ташқари) озод қилинди.​​
 

 

Манба: ЎзА